Skip to content
Советот на СДСМ е проширен со нови домашни и меѓународни членови, меѓу кои поранешен еврокомесар, експерти од европски прогресивни организации, актуелна словенечка државна секретарка, како и домашни новинари, правници и експерти за јавни политики.
Новите членови ги објави Ана Чупеска, која од декември 2025 година го води Советот на партијата.
Во Советот влегуваат Манчо Митевски, Тања Томиќ, Валентин Нешовски и Виолета Дума, како и Јонас Андерсон, Ласло Андор, Даша Шашиќ Шиловиќ, Хедвиг Џусто, Нева Грашиќ и Каролина Леаковиќ.
„Ова стратешко тело ќе има клучна улога во трасирањето на нашите прогресивни јавни политики“, напиша Чупеска, додавајќи дека Советот останува отворен и за други кои сакаат да придонесат во креирањето на политиките на партијата.
Меѓу домашните членови е Манчо Митевски, долгогодишен новинар и уредник, кој повеќе од четири децении работел во македонското новинарство и бил еден од основачите на „Утрински весник“.
Тања Томиќ е поранешна пратеничка на СДСМ и дипломиран градежен инженер. Во партијата претходно била и генерална секретарка на СДММ, а била дел и од Извршниот одбор на СДСМ.
Нов член е и Валентин Нешовски, новинар, уредник, писател и експерт за комуникации. Работел во повеќе македонски медиуми, а во 2000 година добил новинарска награда на УНХЦР за сторија поврзана со бегалските кризи. Во професионалната кариера работел и на стратешки комуникации и на комуникацискиот процес поврзан со европската интеграција на Македонија.
Во Советот влегува и поранешната судијка Виолета Дума, која има долгогодишно искуство во правосудството и работела како судијка во Основниот и Апелациониот суд во Скопје. Таа и претходно била ангажирана во партиските тела на СДСМ, вклучително и како претседателка на Комисијата за правда.
Меѓу меѓународните имиња е Ласло Андор, унгарски економист и актуелен генерален секретар на Фондацијата за европски прогресивни студии – FEPS. Андор од 2010 до 2014 година беше еврокомесар за вработување, социјални прашања и инклузија, а има и долгогодишна академска кариера на повеќе европски универзитети.
Јонас Андерсон е програмски менаџер за Западен Балкан во шведскиот Olof Palme International Center и е вклучен во програми за демократски развој и соработка со политички и граѓански организации во регионот.
Даша Шашиќ Шиловиќ е претседателка на CEE Network for Gender Issues и една од долгогодишните фигури во регионалните програми за родова еднаквост и социјалдемократска соработка. Таа е поврзана и со развојот на Korčula School, регионална платформа за дебати за прогресивни политики и родова еднаквост.
Во Советот е избрана и Хедвиг Џусто, која во FEPS ги раководи меѓународните програми и е главна уредничка на „The Progressive Post“. Нејзината работа е фокусирана на европската политика, меѓународните односи, миграцијата и Западен Балкан.
Меѓу новите членови е и Нева Грашиќ, актуелна државна секретарка за европски прашања, меѓународно право, заштита на интересите и економска дипломатија во Министерството за надворешни и европски работи на Словенија. Таа е активно вклучена во словенечката политика кон проширувањето на ЕУ и Западен Балкан.
Каролина Леаковиќ е долгогодишна членка на Социјалдемократската партија на Хрватска и поранешна пратеничка во хрватскиот Сабор. Во нејзиниот политички и професионален ангажман се опфатени работничките права, социјалната политика, родовата еднаквост и меѓународната соработка.
Со проширувањето, Советот на СДСМ добива комбинација од домашни членови со искуство во медиумите, правосудството и јавните политики и претставници од европските социјалдемократски и прогресивни мрежи.
