Skip to content
Суверениот клауд повеќе не е само прашање каде компаниите ги чуваат податоците, туку станува основа за тоа како безбедно ќе ја користат вештачката интелигенција, порача претседателот на Стопанската комора на Србија, Марко Чадеж, на конференцијата „Srbija Cloud Conference – Suverena cloud infrastruktura“ во Белград.
„Суверениот клауд е темел за безбедна примена на ВИ“, рече Чадеж, нагласувајќи дека Србија паралелно мора да ја усогласува својата дигитална инфраструктура со европската регулатива. Според него, земјата регулаторно е на почетокот на процесот, но инфраструктурно веќе располага со државен дата-центар и суперкомпјутерски капацитети.
Под „суверен клауд“ се подразбира инфраструктура кај која организацијата има поголема контрола врз тоа каде физички се чуваат и обработуваат податоците, кој има пристап до нив и под чие законодавство работи системот. Темата станува особено важна со влегувањето на ВИ во банки, фабрики, јавна администрација и други системи каде прекин на надворешна услуга или губење контрола над критични податоци може да има сериозни последици.
Чадеж посочи дека европските партнери сè повеќе ќе бараат од компаниите да покажат каде ги чуваат податоците, кој може да им пристапи, што се случува при безбедносен инцидент и дали компанијата може да ги задржи податоците при промена на провајдер. Според него, конкурентноста повеќе нема да се мери само преку цена, квалитет и инженерско знаење, туку и преку усогласеноста со правилата за податоци и дигитална безбедност.
Конференцијата беше посветена токму на усогласувањето со европските правила, меѓу кои NIS2 за сајбер-безбедност, GDPR за личните податоци, DORA за дигиталната отпорност во финансискиот сектор, AI Act и европските правила за здравствени податоци. На собирот учествуваа претставници на институции, регулатори, академската заедница и компании.
Чадеж оцени дека јавниот сектор во Србија веќе дел од податоците ги префрлил во суверена клауд инфраструктура, додека приватниот сектор допрва го очекува поголема миграција. Целта, според него, е српските компании да можат да користат ВИ под сопствена контрола, а истовремено да останат конкурентни на европскиот пазар.
