Санчез распиша предвремени избори во Шпанија за 29 ноември

Шпанскиот премиер Педро Санчез распиша предвремени парламентарни избори за 29 ноември, девет месеци пред редовниот крај на мандатот. Одлуката следува по поразот на Владата во парламентот околу пакетот мерки за домување и по масовните протести поради високите кирии и станбената криза.

„Време е шпанскиот народ да одлучи каква иднина сака за себе и за земјата“, порача Санчез во обраќањето во Мадрид.

Неговата малцинска влада во последниот период сè потешко обезбедува парламентарна поддршка. Минатата недела беа отфрлени два владини декрета со кои требаше да се засили заштитата на станарите и да се ограничат дел од последиците од растечките трошоци за домување.

Мерките предвидуваа продолжување на заштитата од иселување за ранливи лица, ограничувања на растот на кириите и построги правила за краткорочно изнајмување.

По нивното отфрлање, десетици илјади луѓе излегоа на протести во повеќе шпански градови. Само во Мадрид, според владините проценки, протестираа околу 70.000 луѓе.

Политичкиот притисок врз Санчез се зголеми и поради неколку други кризи, меѓу кои миграциските тензии, корупциски случаи поврзани со лица од неговото политичко опкружување и долготрајните проблеми со обезбедување стабилно парламентарно мнозинство.

Според истражување на SocioMétrica спроведено кон крајот на септември, Народната партија имала 33,9 отсто поддршка, Социјалистичката партија на Санчез 25,7 проценти, а Vox 18 отсто.

Санчез е на власт од 2018 година. Актуелниот мандат го започна во 2023 година, но Владата во него не успеа да обезбеди стабилно мнозинство и зависеше од поддршката на помали регионални и каталонски партии.

Неговата одлука за предвремени избори значи дека Шпанија ќе влезе во кратка и интензивна кампања во која домувањето, трошоците за живот, миграцијата и економијата ќе бидат меѓу главните теми.

И покрај политичката нестабилност, шпанската економија останува една од побрзорастечките меѓу големите економии во еврозоната, а невработеноста е на најниско ниво во повеќе години.

На 29 ноември гласачите ќе одлучат дали Санчез ќе добие нов мандат или Шпанија ќе влезе во нова политичка конфигурација.