Рускиот претседател Владимир Путин призна дека Москва извршува напади врз трговски бродови во Црното Море. Изјавата дојде по серијата напади со беспилотни летала врз трговски бродови кај Бугарија и Романија, во кои загинаа или исчезнаа морнари.
На прес-конференцијата по самитот на Азиско-пацифичката економска соработка во Кина, Путин рече дека руските сили почнале да дејствуваат на сличен начин откако Украина започна напади врз руски танкери, пренесоа новинските агенции и медиумите.
„Тие почнаа да ги напаѓаат нашите танкери во Црното Море. Како одговор, како што сите знаат, ние почнавме да дејствуваме на ист начин. Нашите одмазднички акции се покажаа многу поболни за режимот отколку неговите обиди да ја оштетат нашата економија“, рече рускиот претседател.
Неговите зборови беа имплицитно признание за руските напади врз бродовите во Црното Море, иако Путин не именуваше конкретни бродови.
БГНЕС потсетува дека од почетокот на октомври, најмалку 15 комерцијални бродови биле погодени од напади со беспилотни летала во близина на Бугарија и Романија.
На 5 октомври, товарниот брод Ројад Мамадов беше нападнат покрај романскиот брег. Двајца членови на екипажот загинаа. Еден ден подоцна, „Алфа Ватан“ беше потопен покрај бугарскиот брег, а „Ејбл“ беше оштетен.
На 13 октомври, „Челзи 3“ и „ХС Дигнити“ беа нападнати покрај бугарскиот брег. Вториот брод потона, а 11 морнари беа пријавени како исчезнати.
На 14 октомври, дрон го погоди танкерот Јара Ј во романските територијални води, а на 15 октомври, „Вајн Трејдер“ беше нападнат кај Сулина. Седум морнари од неговиот екипаж исчезнаа.
На 23 октомври, „Хорив“ беше погоден кај Констанца, а на 28 октомври, контејнерскиот брод „Контшип Џет“ потона по нападот на морнаричките беспилотни летала кај ’ртот Калијакра. Сите 18 членови на екипажот беа спасени.
Новиот бран напади започна на 13 ноември, кога „Лариса 1“ беше погоден покрај романскиот брег.
На 14 и 15 ноември, беспилотни летала погодија уште три брода во делтата на Дунав – танкерите „Евија Петрол В“ и „Али Наџафов“ и товарниот брод „Марсол“. Нападите предизвикаа пожари кои беа ставени под контрола од страна на екипажите.
На 16 ноември, носачот на пченица „Бетул 8“ потона во близина на „Ртот Калијакра“. Сите 12 морнари беа спасени.
Само еден ден подоцна, на 17 ноември, беше нападнат и танкерот „Гас Хаски“, кој превезуваше околу 3.400 тони течен гас од Египет до Романија. Бродот потона во близина на бугарскиот брег, а сите 19 членови на екипажот беа евакуирани.
Нападите, од кои некои беа извршени во територијалните води на земја-членка на НАТО, предизвикаа сериозна загриженост за безбедноста на меѓународниот превоз во Црното Море.

