Skip to content
Четиридневна работна недела, работа од дома и поголема грижа за слободното време често се користат како аргумент дека младите денес не сакаат да работат. Податоците од германскиот пазар на труд, сепак, покажуваат спротивно: генерацијата Z е поактивна на пазарот на труд отколку младите пред една деценија.
Од секои 100 млади на возраст меѓу 20 и 24 години во Германија, 77 работат или активно бараат работа. Стапката на активност во оваа возрасна група е највисока во последните неколку децении и од 2015 година наваму е зголемена за околу седум процентни поени.
„Навистина постои стереотип дека генерацијата Z не е подготвена да работи. Но според сите цврсти показатели со кои располагаме, тоа не е точно“, вели Енцо Вебер од германскиот Институт за истражување на пазарот на труд и професиите, IAB.
Истражувањето на IAB покажува дека растот е особено забележлив кај студентите. Меѓу 2015 и 2023 година стапката на активност кај студентите на возраст од 20 до 24 години пораснала за 19,3 процентни поени и достигнала 56 проценти. Кај младите од истата возраст кои не студираат, стапката изнесувала 85,9 проценти.
Податоците не потврдуваат ниту дека младите денес почесто ги менуваат работните места во споредба со претходните генерации. Нема значителна разлика ниту во посакуваниот број работни часови меѓу младите и постарите работници.
Она што се променило не е толку желбата за работа, колку очекувањата од работното место.
Младите повеќе бараат флексибилност, подобар баланс меѓу работата и приватниот живот и поголема можност сами да го организираат времето. Вебер како можни причини ги посочува искуството од пандемијата, поголемата вработеност на двајцата партнери во семејствата и зголемената потреба за автономија.
Слични резултати покажува и репрезентативната студија „Млади во Германија 2026“, во која биле опфатени повеќе од 2.000 лица на возраст од 14 до 29 години. Истражувањето покажува висока подготвеност за работа, но истовремено и зголемена несигурност кај младите дали вложениот труд и натаму носи соодветна економска корист.
Германските податоци не можат автоматски да се пресликаат врз Македонија, бидејќи станува збор за различни пазари на труд, плати и услови за вработување. Но тие сериозно го доведуваат во прашање распространетиот стереотип дека генерацијата Z едноставно „не сака да работи“.
Бројките покажуваат дека младите се присутни на пазарот на труд повеќе отколку пред десетина години. Разликата е во тоа што сè почесто бараат поинакви услови под кои ќе ја работат истата работа.
