116 години од раѓањето на Мајка Тереза, централно одбележување во Скопје

Во Скопје денеска се одбележуваат 116 години од раѓањето на Мајка Тереза, една од најпознатите личности родени во македонската престолнина и добитничка на Нобеловата награда за мир.

Владина делегација предводена од првиот вицепремиер и министер за европски прашања Беким Сали ќе положи цвеќе пред спомен-плочата на местото каде што се наоѓала родната куќа на Мајка Тереза во центарот на Скопје.

Централното одбележување е предвидено во Музејот на современата уметност, под покровителство на Сали. На настанот е најавено присуство и на косовскиот премиер Албин Курти.

Поради посетата и одржувањето на настанот, Министерството за внатрешни работи најави посебен режим на сообраќај во делови од Скопје и апелираше возачите да ги почитуваат насоките на полициските службеници.

Мајка Тереза, родена како Гонџа Агнес Бојаџиу, е родена на 26 август 1910 година во Скопје. На местото каде денес се наоѓа нејзината Спомен-куќа до земјотресот во 1963 година била католичката црква „Пресвето Срце Исусово“, во која таа била крстена и ја примила првата причест.

Во 1979 година ја доби Нобеловата награда за мир за нејзината хуманитарна работа со сиромашните и болните, а во 2016 година папата Франциск ја прогласи за светица.

Мајка Тереза почина на 5 септември 1997 година во Калкута, на 87-годишна возраст.