Skip to content
Македонската Армија доби нова воена опрема обезбедена со финансиска поддршка од Европската Унија преку Европскиот мировен фонд (European Peace Facility), во рамки на пакетот помош наменет за модернизација и зајакнување на одбранбените капацитети на земјата.
На презентацијата на дел од опремата во касарната „Илинден“ во Скопје, премиерот Христијан Мицкоски оцени дека поддршката претставува признание за посветеноста на македонската Армија кон НАТО и Европската Унија и изрази благодарност до ЕУ за континуираната помош во процесот на модернизација.
Министерот за одбрана Владо Мисајловски истакна дека со ова е целосно реализиран првиот пакет помош во вредност од 40 милиони евра, обезбеден преку Европскиот мировен фонд, а во тек е реализација и на втор пакет поддршка за Армијата.
Европскиот мировен фонд е инструмент на Европската Унија преку кој се финансираат мерки за зајакнување на одбранбените капацитети на партнерските земји и поддршка на меѓународниот мир и безбедност. Северна Македонија е една од земјите-кориснички на овој механизам, преку кој Армијата добива современа опрема во согласност со НАТО стандардите.
Донацијата претставува една од најзначајните форми на европска поддршка за модернизацијата на македонските вооружени сили и е дел од пошироката соработка меѓу Европската Унија и Северна Македонија во областа на безбедноста и одбраната.
