Skip to content
Градоначалникот на Општина Центар, Горан Герасимовски, ги отфрли обвинувањата од ЗНАМ и советникот од Левица за наводна цензура на снимката од седницата што во живо се пренесувала на YouTube-каналот на Општината.
Според Герасимовски, станува збор за технички прекин на интернет-врската, а не за намерно прекинување или отстранување на содржина.
„Нема цензура таму каде што сè е јавно. Темата ‘Батурана’ не е ниту скриена, ниту нова. За неа јавно се дебатираше на седници на Советот и на јавна презентација, во присуство на граѓани“, наведува Герасимовски.
Тој тврди дека ставовите на советниците повеќепати биле јавно изнесени и дека се достапни за јавноста.
„Да се зборува за ‘цензура’ на тема која од почеток до крај се одвива транспарентно е обид за манипулација и свесно пласирање невистини. Ништо не е сокриено. Ништо не е избришано“, се наведува во реакцијата.
Герасимовски оценува дека претставувањето на техничкиот прекин како цензура е политичка манипулација и прашува зошто би се криела тема за која граѓаните веќе имале можност јавно да ги слушнат ставовите на советниците.
Според него, прекинот на интернет-врската е технички пропуст кој може да се случи при преноси во живо.
„Несериозно и неприфатливо е од технички проблем да се конструира политичка приказна и да се глуми жртва заради собирање евтини политички поени“, порача Герасимовски.
