Skip to content
Либерално-демократската младина, ЛиДеМ, бара зголемување на субвенционираниот студентски оброк, кој и во академската 2025/2026 година остана 140 денари дневно, и ја обвинува Владата дека не ја применува законската одредба за негово усогласување со инфлацијата.
Според важечките правила, субвенционираниот студентски оброк е финансиска поддршка од 140 денари дневно за купување храна. Министерството за образование и наука истиот износ го наведе и во јавниот повик за академската 2025/2026 година.
Од ЛиДеМ посочуваат дека член 2 од Законот за субвенциониран студентски оброк предвидува износот да се усогласува согласно инфлациската стапка по секоја фискална година, пред донесувањето на Буџетот за наредната година.
Таквата одредба навистина е содржана во законското решение со кое во 2023 година студентскиот оброк беше зголемен од 120 на 140 денари. И во поновите повици на студентските организации се наведува дека законската обврска за усогласување со инфлацијата останува во сила.
„Денес со 140 денари студент треба да обезбеди пристоен оброк, додека секој што влегол во маркет, пекара или менза знае колку реално вредат тие пари“, велат од ЛиДеМ.
Според младинската организација, последното зголемување било во 2023 година, а оттогаш растот на цените дополнително ја намалил реалната вредност на студентската поддршка.
ЛиДеМ најавува дека ќе ги искористи достапните правни и институционални механизми за да побара одговор зошто износот не бил усогласуван и кој е одговорен за спроведувањето на законската одредба.
Прашањето за зголемување на студентскиот оброк не се отвора првпат. Националното студентско тело уште во септември 2025 година побара износот да се зголеми од 140 на 150 денари, исто така повикувајќи се на законската обврска за усогласување со инфлацијата.
Од ЛиДеМ оценуваат дека станува збор за прашање на почитување на законските обврски, а не само за висината на дневната субвенција.
„Ако растат цените, мора да расте и студентскиот оброк“, порачаа од организацијата.
