Skip to content
Речиси цела Македонија денеска е во зона со висок ризик од пожари, покажува метеоролошкиот индекс на пожар. Центарот за управување со кризи предупредува дека актуелните временски услови создаваат сериозна опасност од избувнување и брзо ширење на пожари на отворено и шумски пожари со висок интензитет.
На картата најголем дел од земјата е означен со портокалова боја. Исклучок се Шар Планина и подрачјата околу Охрид и Ресен, каде што ризикот е оценет како среден и е означен со жолта боја.
Предупредувањето доаѓа во период кога пожарникарските служби веќе се соочуваат со голем број пожари на отворено. Според утринскиот пресек на ЦУК, во изминатото деноноќие до 7:30 часот биле регистрирани 29 пожари, од кои шест сè уште биле активни, еден бил под контрола, а 22 биле изгаснати.
Активни пожари има во повеќе делови од земјата, меѓу кои Студеничани, Македонски Брод, Велес, Зелениково, Јегуновце, Сарај, Прилеп и Долнени. На дел од локациите гори мешана, дабова и габерова шума, а на други ниска вегетација и грмушки.
Особено сложена е состојбата на потегот меѓу Велес и Зелениково, каде пожарот од С’лп и Горно Село се ширел кон Карабуниште, Бузалково, Добрино и Тисовица. Таму е зафатена и квалитетна дабова шума.
Од ЦУК апелираат граѓаните да бидат максимално внимателни при движење и престој во природа и воопшто да не користат оган на отворено. Во услови на суво земјиште, високи температури и исушена вегетација, дури и мала искра може за кратко време да предизвика пожар кој тешко се контролира.
Секој забележан пожар треба веднаш да се пријави на единствениот број за итни случаи 112.
