На 11 години Македон освои 1.440 поени на SAT и влезе во програмата на „Џонс Хопкинс“

Дванаесетгодишниот Македон Димитровски е примен во програмата за талентирани млади при Универзитетот „Џонс Хопкинс“ во Балтимор, откако на тестирањето постигнал резултати со кои се стекнал и со признанието „Grand Honors / SET“.

Успехот е уште повпечатлив ако се земе предвид дека Македон уште на 11-годишна возраст постигнал 1.440 поени на SAT тестот – 740 по математика и 700 по читање и пишување. Зад себе има и повеќе од 20 златни медали од меѓународни математички натпревари.

Центарот за талентирани млади на „Џонс Хопкинс“ – CTY користи тестови над нивото предвидено за возраста на ученикот за да идентификува деца со исклучително развиени способности. Највисоката категорија „Grand Honors / SET“ се доделува за резултати значително над стандардите за соодветната возраст и одделение.

Програмата не го оценува само знаењето стекнато во училиште, туку и вербалното и математичкото расудување и способноста ученикот да работи со материјал кој е значително над неговото редовно образовно ниво.

Како што објави неговиот татко Владимир Димитровски, зад досегашните резултати стои големата љубов на Македон кон знаењето и континуираната работа.

Со приемот во CTY, 12-годишниот Македон добива пристап до образовни програми наменети за ученици чии способности се неколку нивоа над нивната генерација.