Skip to content
Пет пожари на отворено се активни низ Македонија до 13 часот денеска, три се ставени под контрола, а еден е изгаснат, соопшти Центарот за управување со кризи. Вкупно во текот на денот се регистрирани девет пожари.
Во Македонски Брод активен е пожарот кај местото Видуш, во близина на селото Драгов Дол, каде огнот зафатил ниска вегетација, нискостеблеста шума и грмушки.
И натаму гори и над селата Моране, Вртекица и Рамни Габер во Општина Студеничани, каде е зафатена мешана шума. Пожарот на овој потег се гасне на тежок и непристапен терен.
Активни пожари има и во населбата Илинден, каде гори ниска вегетација, кај селото Чифлик во Општина Желино, каде огнот зафатил ниска вегетација и мешана шума, како и кај битолското село Букри.
Под контрола се пожарите кај градската депонија во Делчево, кај Ново Село на планината Огражден и кај кичевското село Зајас. На овие локации биле зафатени стрништа, борова шума и гуми.
Изгаснат е пожарот кај селото Врањовце во Општина Врапчиште, каде горела ниска вегетација.
