Skip to content
Опозициската СДСМ оцени дека институциите со задоцнување признале дека по епидемијата предизвикана од загадената вода во Гостивар постои ризик од појава на хепатит А и Е, како и од други заразни заболувања, и побара кривична одговорност за, како што наведува, пропустите во справувањето со кризата.
„По епидемијата предизвикана од загадената вода во Гостивар, власта сега официјално признава дека постои ризик од хепатит А и Е, како и од други заразни заболувања. Ова е токму она за што проф. д-р Венко Филипче предупреди уште минатата недела“, се наведува во соопштението на СДСМ.
Од партијата тврдат дека институциите не реагирале навреме и дека ја криеле информацијата од јавноста додека, како што наведуваат, граѓаните консумирале загадена вода.
СДСМ наведува дека јавноста сè уште не добила официјален и потпишан извештај со анализите за таканаречената „техничка вода“ во Гостивар и бара да бидат објавени информациите за институцијата што ги изработила анализите, лицето што го потпишало извештајот и параметрите врз основа на кои е оценето дека водата е безбедна за употреба.
Опозициската партија повика итно да се спроведат анализи на водата за пиење во сите населени места во државата, а резултатите целосно и без одложување да ѝ бидат ставени на увид на јавноста.
Во соопштението, СДСМ бара и кривична одговорност за случајот, наведувајќи дека, според нив, треба да одговараат министерот за здравство Сашо Клековски, директорката на Државниот санитарен и здравствен инспекторат, директорите на локалните центри за јавно здравје и сите надлежни кои, како што тврди партијата, знаеле за состојбата, а не презеле соодветни мерки за заштита на здравјето на граѓаните.
