Skip to content
Охрид продолжува со победничкиот ритам во Втората македонска фудбалска лига, откако денеска го совлада Шкупи со 3:0 на гостувањето во Чаир. Во десеттото коло убедлив настап имаше и Брера, која на домашен терен го победи Новаци со 4:1, додека Кожуф славеше против Еуромилк со 3:1.
Охриѓани влегоа во натпреварот како фаворити, со оглед на тоа што Шкупи до ова коло немаше освоено ниту еден бод. Гостите ја оправдаа улогата и со три постигнати гола стигнаа до нови три бода во борбата за највисок пласман.
Убедлива беше и струмичка Брера, која ја искористи предноста на домашниот терен и со четири погодоци ја совлада екипата на Новаци.
Во третиот денешен натпревар, Кожуф одигра успешен гостински меч во Лисиче, совладувајќи го Еуромилк со 3:1.
Десеттото коло продолжува утре со уште четири натпревари.
Посебно внимание привлекува пресметката меѓу Македонија Ѓорче Петров и Осогово. Кочанскиот состав, по првата сезонска победа во претходното коло, ќе се обиде да продолжи со освојување бодови и да ја подобри позицијата на табелата.
Работнички ќе се соочи со Беласица, во уште еден натпревар со значење за понатамошниот расплет на второлигашката сезона.
По денешните резултати, Охрид го задржува победничкиот чекор, додека Брера и Кожуф покажаа дека остануваат сериозни конкуренти во првенството.
