Skip to content
Бразилскиот претседател Луиз Инасио Лула да Силва вчера забрана за онлајн обложување во најголемата земја во Јужна Америка и претстави нова програма наменета за домаќинствата за полесно отплаќање на долгот.
Овие потези доаѓаат пред претседателските избори следниот месец, а анкетите покажуваат тесна трка меѓу актуелниот претседател и сенаторот Флавио Болсонаро, најстариот син на поранешниот бразилски претседател Жаир Болсонаро.
Онлајн обложувањето ќе биде забрането
Извршната наредба на претседателот Лула да Силва им забранува на онлајн обложувалниците да работат во Бразил, помалку од две години откако владата донесе законска рамка што ѝ овозможи на индустријата да работи. За регулативата да остане на сила, Конгресот мора да ја одобри во рок од 120 дена.
Растот на трошоците за коцкање ги исцрпи буџетите на домаќинствата и придонесе за рекордни нивоа на долг на домаќинствата, предупредија бразилските власти. Неодамнешните анкети на јавното мислење покажаа дека приближно три четвртини од Бразилците поддржуваат целосна забрана за онлајн обложување.
„Се соочуваме со проблем со јавното здравје поврзан со онлајн обложувањето. Тоа е сериозен проблем“, рече министерот за финансии Дарио Дуриган.
Обложувалниците се достапни до 5 октомври
Веб-страниците за онлајн обложување ќе им бидат достапни на корисниците до 5 октомври за да им овозможат да ги повлечат преостанатите средства. Од 6 октомври, мрежните оператори и продавниците за апликации ќе мора да го блокираат пристапот до овие веб-страници.
На предизборен состанок во Рио де Жанеиро, сенаторот Болсонаро ја нарече оваа забрана популистичка, лицемерна и политички мотивирана.
Бразилците трошат милијарди долари на обложување секоја година
Онлајн обложувањето во Бразил беше легализирано во 2018 година, за време на поранешниот претседател Мишел Темер. Во 2023 година, сегашниот претседател, Лула да Силва, потпиша закон со кој се утврдуваат правилата и, покрај спортското обложување, се одобруваат игри во онлајн казината.
Од јануари 2025 година, овластените организатори можат да ги обезбедуваат своите услуги на национално ниво доколку ја платиле концесиската такса и ги исполниле другите регулаторни барања.
Министерството за финансии проценува дека бразилските домаќинства трошат околу 60 милијарди реали, или 11,6 милијарди американски долари, годишно на онлајн обложување, што носи 10 милијарди реали даночни приходи во државниот буџет, или околу 1,93 милијарди долари.
Владата ќе ги откупи долговите на домаќинствата
Лула да Силва, исто така, откри програма за намалување на товарот на долгот на домаќинствата. Владата ќе одржи аукција за откуп и реструктуирање на долгот во ноември, со која ќе се издвојат 15 милијарди реали, или околу 2,9 милијарди долари, за преземање до 150 милијарди реали неплатени долгови, со отпис од 90 проценти.
Се очекува програмата да покрие околу половина од вкупниот износ на подобни долгови.
Домаќинствата на тој начин ќе можат да ги подмират своите доспеани обврски по значително намалена вредност. Станува збор за долгови не поголеми од 10.000 реали, или околу 1.930 долари, кои доцнат за отплата помеѓу две и четири и пол години.
