Иран понуди отворање на Ормускиот Теснец во рок од седум дена, се чека одговор од Вашингтон

Техеран доставил предлог за запирање на регионалните судири и повторно отворање на Ормутскиот Теснец, но американските медиуми објавија дека претседателот Доналд Трамп не го прифатил планот. Иранските власти велат дека сè уште очекуваат официјален одговор од Вашингтон.

Иран понуди повторно да го отвори Ормутскиот Теснец и да ги обнови преговорите за својата нуклеарна програма во рок од седум дена, доколку Соединетите Американски Држави исполнат неколку услови, соопшти иранскиот министер за надворешни работи Абас Арагчи.

Предлогот, според Техеран, бил доставен до американската страна преку катарски посредници за време на Генералното собрание на Обединетите нации во Њујорк.

Планот предвидува САД да ја укинат поморската блокада на иранските пристаништа, да дозволат продажба на иранска нафта без санкции и да прифатат прекин на огнот кој би го опфатил и конфликтот во Либан. Арагчи изјави дека првите чекори би можеле да бидат спроведени за четири до пет дена, Теснецот да биде отворен на шестиот ден, а на седмиот ден да започнат пошироки американско-ирански преговори.

Американскиот весник „Волстрит журнал“, повикувајќи се на неименувани американски претставници, објави дека претседателот Доналд Трамп го отфрлил предлогот. Ројтерс нагласува дека не успеал независно да ја потврди оваа информација, додека Белата куќа соопшти единствено дека разговорите со посредниците се „позитивни и конструктивни“.

Ормутскиот Теснец е една од најважните светски поморски рути за транспорт на енергенси. Пред почетокот на сегашниот конфликт, низ него минуваше околу една петтина од глобално тргуваните количества нафта и гас. Нарушувањето на сообраќајот веќе има последици врз цените на енергијата и светската економија.

Иако предлогот остава простор за разговори за нуклеарната програма, висок ирански претставник изјавил дека Техеран нема да се откаже од правото на збогатување ураниум ниту да ги испрати надвор од земјата своите резерви на високо збогатен ураниум.

Иран утрово, на 26 септември, соопшти дека сè уште чека официјално американско изјаснување.