Skip to content
Шпанија вечерва беше во центарот на еден од највпечатливите астрономски настани во последните децении. За време на тоталното затемнување на Сонцето, Месечината целосно го прекри сончевиот диск, а на небото се појави блескавата сончева корона – надворешниот слој од атмосферата на Сонцето кој во нормални услови е невидлив поради неговата силна светлина.
Затемнувањето ја премина Шпанија од запад кон исток, од Галиција кон Балеарските Острови. Во делови од земјата фазата на целосно затемнување траеше под две минути, доволно небото нагло да потемни и околу црниот диск на Месечината јасно да се исцрта белузлавата, нерамномерна структура на сончевата корона. За Шпанија ова беше прво тотално затемнување на Сонцето по 1912 година.
Посебно внимание привлекоа и огромните структури на работ од Сонцето. За време на тоталитетот можеа да се забележат протуберанци – огромни лакови и облаци од вжештена плазма што се издигнуваат над сончевата површина и се обликувани од неговите силни магнетни полиња. Токму ваквите структури ја откриваат динамичната природа на Сонцето и силната активност во неговата атмосфера.
Сонцето и натаму е во релативно активен период од својот циклус, поради што научниците очекуваа короната при ова затемнување да има сложена и асиметрична структура, со изразени коронални зраци и можни црвеникави протуберанци долж работ на затемнетиот диск.
Тоталните затемнувања се особено важни и за научниците бидејќи Месечината природно го блокира силниот сјај од видливата површина на Сонцето и овозможува детално набљудување на короната. Институтот за астрофизика на Канарските Острови претходно дури изработи компјутерска прогноза за нејзината форма, а податоците од затемнувањето ќе се споредуваат со моделите за подобро разбирање на магнетната активност и процесите поврзани со сончевите бури.
По спектакуларното тотално затемнување што вечерва можеше да се следи од Шпанија, следното големо сончево затемнување видливо и од Македонија ќе се случи на 2 август 2027 година. Кај нас нема да настапи целосна темнина, но Месечината ќе покрие значителен дел од сончевиот диск.
