Skip to content
Според програмската директорка на ХЕРА, Елизабета Божиновска, сеопфатното сексуално образование може да придонесе младите подобро да се грижат за сопственото здравје, но и да развиваат односи засновани врз почит и емпатија.
Божиновска во изјава за Локално.мк, нагласува дека изучувањето на оваа тема има значајна улога во подготовката на младите за препознавање и спречување на различни ризици со кои се соочуваат.
Сеопфатното сексуално образование треба да биде задолжителен предмет во средното образование, сметаат од Асоцијацијата за здравствена едукација и истражување – ХЕРА, откако министерката за образование и наука Весна Јаневска најави дека предметот ќе биде повлечен од наставата поради ревизија на програмата.
„Сеопфатното сексуално образование во практика е системски одговор на сексуалното и врсничкото насилство, уцените, споделувањето интимни фотографии без согласност, токсичните врски, непланираните бремености, превенција на ХИВ и дезинформациите од интернет“, изјавила Божиновска за „Локално“.
Од ХЕРА сметаат дека токму поради овие ризици, темите поврзани со сексуалното и репродуктивното здравје, личните граници, согласноста и насилството треба да бидат дел од системското образование.
Божиновска посочува и дека искуствата од земјите каде што сеопфатното сексуално образование е дел од задолжителниот наставен курикулум покажуваат подоцнежно започнување на сексуалниот живот кај младите, како и пониски стапки на насилство и малолетнички бремености.
Од ХЕРА, според „Локално“, остануваат на ставот дека предметот треба да има место во образовниот систем доколку целта е младите да добијат знаења и вештини за заштита на сопственото здравје и за градење здрави и ненасилни односи.
