Skip to content
Не престанува битката на довчерашните верни сопартијци Зијадин Села и Арбен Таравари, за тоа чија е Алијансата за Албанците. И двајцата тврдат дека стојат на чело на партијата. Водат и судски спор, кој трае повеќе од една година, поточно од денот кога Таравари одлучи да се исклучи од процесот за обединување на АА со Европскиот фронт, и одлучи да се приклучи на опозицијата која, според него, донесе промена и ротација на власта. И Села и Таравари тогаш, организираа партиски конгреси.
Во меѓувреме, деновиве судот во Тетово пресече и партиските печати на Алијанса на Албанците му ги даде на Зијадин Села. Денеска, Села ја поздрави одлуката на Основниот суд во Тетово и рече дека по втор пат судот ја носи истата одлука, односно дека претседател на Алијансата за Албанците треба да се регистрира тој како претставник и претседател на Алијансата за Албанците.
„Во моментов ова е важен чин и момент, бидејќи, веќе се разјаснува патот на Алијансата за Албанците. -АА припаѓа на неговите основачи. АА се враќа на корените и како таква разјаснувањето на оваа ситуација во врска со тоа на кого му припаѓа Алијансата за Албанците е многу важно и за граѓаните на Република Македонија, пред се на Албанците, на другите заеднички заедници“, рече Села.
На новинарско прашање дали ќе ја прифатат одлуката доколку повторно Апелациониот суд ја укине, Села очекува дека и во втората фаза ќе ја добијат битката по прашањето на кого му припаѓа Алијансата за Албанците.
„Основниот суд во Тетово постапил врз основа на забелешките на Апелациониот суд првиот пат предмет кога беше обжалена. Ние, преку нашиот правен застапник, постапивме врз основа на забелешките на Апелациониот суд. Сега нема никаква причина, оти не само што е постапено стопроцентно и според дадените забелешки од Апелациониот суд за тој да донесе спротивна одлука од донесената одлука на Основниот суд во Тетово. Очекуваме дека и во втората фаза ќе го добиеме ова прашање и за волја на вистината, колку побрзо ова прашање дојде до епилог, толку појасно ќе биде политичкото дејствување, не само за Алијансата за Албанците, туку воопшто за албанската политичка сцена“, рече Села.
Од друга страна пак, крилото на Арбен Таравари, одлуката на Судот ја нарече „скандалозна“.
„Скандалозната одлука на судијата Реџепи повторно ќе биде поништена во Апелациониот суд. До конечна одлука го оставаме Села и неговата клика да бидат задоволни од имагинарните одлуки на судијата Реџепи и Али Ахмети“, рече Арбен Фетаи, Алијанса за Албанците.
И двата табора и оној на Села и другиот на Таравари, обвинуваат за вршење притисок врз судиите и нивно менување со цел донесување одлуки во корист на субјективни интереси.
