Skip to content
Амбасадата на Франција во Македонија остро го осуди инцидентот со палењето на две дипломатски возила на Бугарската амбасада во Скопје, оценувајќи дека напад врз безбедноста на дипломатските претставништва не може да биде оправдан под никакви околности.
Од Француската амбасада изразија целосна солидарност со персоналот на Амбасадата на Бугарија и порачаа дека безбедноста на дипломатските мисии мора да биде гарантирана во секое време.
Реакцијата доаѓа по вчерашниот инцидент во Скопје, кога беа опожарени две возила поврзани со бугарското дипломатско претставништво. Настанот предизвика дипломатски реакции поради чувствителноста на напад врз имот на амбасада, особено во контекст на сложените македонско-бугарски односи.
Француската амбасада ја поздрави брзата реакција на македонските власти и напорите за целосно расчистување на случајот. Од таму ги охрабрија властите во Скопје и Софија да продолжат да работат на создавање клима на доверба во билатералните односи.
Министерството за внатрешни работи претходно соопшти дека неколку часа по инцидентот е уапсен 44-годишен маж осомничен за палењето на возилата. Од МВР најавија дека против него ќе биде поднесена кривична пријава по итна постапка.
