Skip to content
Македонија на 25 октомври преминува на зимско сметање на времето, кога во 3 часот по полноќ стрелките ќе се вратат на 2 часот. Иако ќе добиеме дополнителен час за спиење, промената може да го наруши природниот ритам на организмот. Специјалистката за спиење Али Хер советува како телото постепено да се приспособи на новото време.
Поместувањето на часовникот за само еден час може да влијае врз квалитетот на сонот, концентрацијата и секојдневното функционирање. Некои луѓе почнуваат да се будат порано од вообичаено, додека други потешко заспиваат.
Според докторката Хер, која за британскиот „Експрес“ сподели практични совети, подготовката не треба да започне дури на денот кога се менува времето.
Таа препорачува неколку дена претходно постепено да се поместува времето на легнување. Наместо нагла промена на навиките, секоја вечер треба да се легнува околу 15 минути подоцна од претходната.
На тој начин организмот полесно го усогласува својот внатрешен биолошки часовник со новиот распоред.
Истата препорака се однесува и на вечерните оброци. Постепеното поместување на времето за вечера може да помогне во приспособувањето, бидејќи и дигестивниот систем учествува во регулирањето на циклусот на спиење и будност.
Докторката советува внимание да се посвети и на условите во спалната соба. Просторијата треба да биде мирна, уредна и со пригушено осветлување пред спиење.
Креветот, според неа, треба првенствено да се користи за спиење, наместо за работа, гледање телевизија или други дневни активности. На тој начин организмот полесно го поврзува легнувањето со одмор.
Важна е и редовноста на навиките. Одржувањето приближно ист распоред за будење, физичка активност и оброци може да ги ублажи последиците од промената на времето.
Американските центри за контрола и превенција на болести, исто така, препорачуваат постепено приспособување на распоредот за 15 до 20 минути дневно, почнувајќи неколку дена пред преминувањето на зимско време.
Дневната светлина има значајна улога во регулирањето на биолошкиот часовник. Престојот на природна светлина во текот на денот може да помогне во одржувањето на нормалниот циклус на спиење, додека намалувањето на силното осветлување навечер го олеснува заспивањето.
Стручњаците препорачуваат и ограничување на кофеинот во доцните попладневни и вечерни часови, бидејќи може дополнително да го наруши сонот.
Промената на времето не влијае подеднакво врз сите луѓе. Кај некои приспособувањето поминува речиси незабележливо, додека кај други може да предизвика неколкудневен замор и нарушен сон.
Во Македонија летното сметање на времето официјално завршува во недела, на 25 октомври 2026 година. Во 3 часот по полноќ часовниците ќе се вратат еден час наназад, со што ноќта ќе трае еден час подолго.
