Skip to content
СДСМ побара оставка од министерот за внатрешни работи Панче Тошковски и утврдување одговорност за заминувањето на Ива Михаилова во Бугарија, иако против неа се води судска постапка и ѝ биле одземени двата пасоша. Од опозициската партија обвинуваат дека нејзиното преминување на границата било овозможено со знаење на надлежните институции.
На прес-конференција, претставничката на СДСМ, Кети Штерјова, изјави дека Тошковски треба прв да понесе политичка одговорност за случајот.
Според СДСМ, останува неодговорено прашањето како Михаилова успеала да ја напушти Македонија со одземени македонски и бугарски пасош, а притоа да пристигне во Бугарија, каде што побарала медицинска помош.
Од партијата посочуваат дека Михаилова јавно тврдела дека ја преминала границата легално, со лична карта, и дека граничните службеници биле запознаени со нејзиното преминување. Наспроти тоа, МВР соопшти дека нема евидентиран излез од државата.
СДСМ обвинува дека заминувањето на Михаилова било однапред договорено, поврзувајќи го случајот и со претходната посета на министерот за надворешни работи Тимчо Муцунски на Софија. За овие обвинувања партијата не презентираше докази.
Опозициската партија бара да се утврди дали некој од институциите давал инструкции, овозможил преминување на границата или пропуштил да постапи согласно своите надлежности.
Во реакцијата СДСМ се осврна и на други безбедносни случаи, меѓу кои преминување дрога преку граница, бегство на осомничен од полициска станица и постапувањето на полицијата во случаи на семејно насилство. Според партијата, овие случаи покажуваат сериозни пропусти во работењето на МВР.
Од СДСМ го обвинија и премиерот Христијан Мицкоски дека го штити Тошковски од политичка одговорност.
Партијата бара целосно расчистување на околностите под кои Михаилова ја напуштила државата, утврдување на евентуалната одговорност на сите вмешани и оставка од министерот Тошковски.
