Ќе биде уште потопло: Вториот најстуден главен град се пече на 39,5°C

Вториот најстуден главен град во светот се соочува со рекордна жештина. Во Астана, главниот град на Казахстан, на 14 јули беа измерени 39,5 Целзиусови степени, со што беше соборен дневниот рекорд од 35,3 степени поставен пред 34 години.

Ова е втор температурен рекорд во градот за само три недели. На 23 јуни температурата достигнала 36,8 степени, надминувајќи го рекордот од 1941 година. Жителите во меѓувреме добивале предупредувања преку државниот систем за итни случаи, додека температурите со денови се задржувале околу 36 степени.

Жештината го зафатила целиот Казахстан. Во југозападните делови биле измерени до 44 степени, а на југот и југоистокот температурите се движеле меѓу 45 и 48 степени. Метеоролошките служби очекуваат екстремно топлото време да продолжи до крајот на јули.

Регионалниот директор на Светската здравствена организација за Европа, Ханс Клуге, предупреди дека состојбата ќе се влошува. Казахстан и Узбекистан, според проекциите, се меѓу земјите во Централна Азија во кои најбрзо ќе расте смртноста поврзана со топлотните бранови.

Казахстан ја забележал најтоплата година досега во 2025 година, кога просечната температура била за 2,98 степени повисока од климатскиот просек. Светската банка предупредува дека без посилни мерки за приспособување, бројот на смртни случаи поврзани со жештините во градовите низ Европа и Централна Азија може тројно да се зголеми до 2050 година.