Skip to content
Мицкоски фрли лопата за нов затворен базен во Основното училиште „Ацо Шопов“ во Општина Бутел, каде денеска беше поставен камен-темелник за изградба на објектот. Премиерот Христијан Мицкоски присуствуваше на настанот и порача дека проектот треба да донесе подобри услови за учениците и повисок квалитет на живот за жителите од овој дел на Радишани.
Според Мицкоски, со доградбата на училиштето и изградбата на затворениот базен се продолжува реализацијата на проекти во општините низ државата. Тој оцени дека ваквите инвестиции треба постепено да ги подобруваат условите за граѓаните, особено во средини каде што со години се чувствувале инфраструктурни недостатоци.
Премиерот изјави дека Владата продолжува со проектите што веќе се започнати, а за оние што досега не биле отпочнати се поставуваат камен-темелници и се воведуваат во работа. Според него, тоа е модел што покажал резултати и за кој веќе се размислува да продолжи и во 2027 година.
Мицкоски порача дека Владата останува посветена на реализација на проекти и на, како што рече, исправување на недостатоците што се таложеле во минатото. Изградбата на затворениот базен во ОУ „Ацо Шопов“ треба да биде дел од таа поширока линија на локални инвестиции, со фокус на училиштата, спортската инфраструктура и условите за децата.
