Skip to content
Минималната пензија во Бугарија треба да се зголеми од 322,37 на 347,51 еврa од 1 јули, откако бугарските пратеници едногласно ги поддржаа измените во таканаречениот продолжен закон за буџетот, со кои најниските пензии ќе се усогласат заедно со останатите пензиски примања.
Измените беа усвоени на прво читање со 196 гласа „за“, без против и воздржани, а целта е пензионерите што земаат минимална пензија за стаж и возраст да не останат надвор од редовното јулско усогласување. Бугарскиот парламент одредил петдневен рок за предлози меѓу првото и второто читање.
Зголемувањето ќе изнесува 7,8 проценти и ќе се пресметува според таканареченото швајцарско правило, односно механизмот според кој пензиите се усогласуваат врз основа на растот на осигурителниот доход и инфлацијата. Со ова, минималната пензија треба да се израмни со темпото на зголемување што ќе го добијат и другите пензионери во земјата.
Министерството за труд и социјална политика на Бугарија претходно соопшти дека законските измени се потребни затоа што постојните одредби не давале правна основа минималната пензија автоматски да се зголеми за 7,8 проценти од 1 јули. Според ресорното министерство, без оваа интервенција дел од највозрасните граѓани би биле ставени во понеповолна положба.
Министерката Наталија Ефремова порача дека навременото усвојување на измените е важно за сите пензионери да бидат рамнопоставени и истовремено да го добијат зголемувањето. Прашањето сега останува во собраниска процедура, но политичката поддршка на првото читање покажува дека мерката има широк консензус.
За Бугарија, која од 2026 година ги изразува јавните финансии и социјалните исплати во евра, ова зголемување е една од првите повидливи пензиски корекции во новата валутна рамка. За пензионерите со најниски примања, разликата од 25,14 евра месечно нема да биде голем пресврт, но ќе биде важна во услови на високи животни трошоци.
