Skip to content
Нова искра меѓу Скопје и Софија отвори случајот со Ива Михајлова од Кочани, млада жена со бугарско државјанство, која според бугарските медиуми веќе осум месеци не може да ја напушти Македонија за да се лекува во Бугарија, откако по сообраќајна несреќа ѝ биле одземени и македонските и бугарските лични документи.
Бугарскиот медиум MediaPool случајот го опиша како „со одземени документи и без здравствена помош“, оценувајќи дека нов личен момент дополнително ги усложнува односите меѓу Скопје и Софија. Темата брзо ја презедоа и други бугарски медиуми, кои ја поставија приказната како прашање на правото на лекување, слободата на движење и положбата на бугарските државјани во Македонија.
Според бугарските извори, Михајлова живее, учи и работи во Софија, но од октомври минатата година не може да го напушти Кочани. Причината е сообраќајна несреќа што сè уште се истражува, а во која таа била повредена. Таа тврди дека не ја предизвикала несреќата и дека другото возило навлегло во нејзината лента.
Во изјава за бугарските медиуми, Михајлова раскажала дека по несреќата била хоспитализирана и дека подоцна ѝ биле утврдени повреди на пршлени. „Немам вина“, е една од пораките што ги пренесоа бугарските медиуми од нејзината изјава.
Таа тврди дека веднаш по несреќата ѝ биле одземени пасошите и дека ѝ било забрането да ја напушти Македонија и градот Кочани. Во дел од бугарските преноси се цитира нејзината изјава: „Ми ги зедоа двата пасоша“.
Според Михајлова, лекарите ѝ препорачале дополнителна интервенција што, како што тврди, не може да ја добие во Македонија, туку во Бугарија или во други земји. Бугарските медиуми го пренесоа и нејзиното предупредување дека состојбата ѝ се влошува, со драматичната реченица: „Ногата ми се парализира“.
Бугарското Министерство за надворешни работи соопшти дека за случајот било информирано откако Михајлова во март побарала помош од бугарската амбасада во Скопје. Според позицијата на МНР, преку програмата за правна помош ѝ бил обезбеден адвокат, а медицинската документација била испратена во Софија и разгледана во бугарска здравствена установа.
Од бугарска страна било обезбедено и медицинско потврдување дека има потреба од лекување во Бугарија и дека такво лекување може да се спроведе таму. Министерството наведува дека ќе продолжи да го следи случајот и да ѝ дава поддршка во рамките на своите надлежности.
Во исто време, бугарското МНР посочува дека судот во Кочани ѝ определил најлесна мерка за обезбедување присуство, но и дека досегашните одлуки за одбивање на промена на мерката отвораат прашања за тоа дали биле разгледани сите факти, медицински документи и сведочења.
