САД и Кипар ја зајакнуваат соработката во борбата против перењето пари во островската држава

САД и Кипар ќе ја зајакнат соработката кога станува збор за подобрување на способноста на Никозија да ги сузбива и гони незаконските финансиски операции во таа земја, соопштија денеска владите на двете земји.

Според западните агенции, Кипар долго време има репутација на канал за незаконски текови и перење пари, и покрај построгиот надзор и отстранувањето на законските дупки од страна на Владата.

Американското Федерално биро за истраги (ФБИ) и кипарската полиција во наредните денови ќе потпишат договор за официјализирање на соработката меѓу правосудните органи во Вашингтон и Никозија, како и со клучните партнери за спроведување на законот на островот.

Американското Министерство за правда и ФБИ, поддржани од Бирото за меѓународни наркотици и спроведување на законот на Стејт департментот, ќе соработуваат со кипарските власти на барање на претседателот Никос Христодулидес.