Може ли да биде независна улогата на Ристова во Судскиот совет, иако е сопруга на градоначалник на ВМРО-ДПМНЕ?

Сопругата на градоначалникот на Радовиш од ВМРО-ДПМНЕ, Данка Ристова, е избрана за нов член на Судскиот совет, заменувајќи ја Лорета Ѓорѓиева на чиј мандат му истече. Изборот е направен преку гласање од судиите во Штипското апелационо подрачје, каде Ристова добила мнозинство гласови.

Од СДСМ го оценуваат овој потег како обид за партизација на Судскиот совет, обвинувајќи дека ВМРО-ДПМНЕ повторно инсталира свои кадри во судството, споредувајќи го процесот со пракси од времето на нивниот „режим“. Богданка Кузеска од СДСМ изјави дека ова претставува „окупација на судството“ од страна на опозиционата партија.

ВМРО-ДПМНЕ го отфрла обвинувањето, истакнувајќи дека Ристова е долгогодишен професионалец со три децении искуство во правосудството. Според нив, нејзиниот избор е резултат на демократски и непосреден процес во кој учествувале судиите. Партијата тврди дека нејзината работа ќе биде независна и дека обвинувањата на СДСМ се неосновани и резултат на политички очај.

-Обвинувањата дека градоначалник на мала општина како Радовиш има каква било моќ или влијание врз процеси од национален карактер, како што е изборот на членови на Судскиот совет, се апсурдни и далеку од реалноста, велат од партијата.

Овој избор е значаен бидејќи Судскиот совет е честа цел на критики од лидерот на ВМРО-ДПМНЕ, Христијан Мицкоски, кој претходно го нарече партиски инструмент. Сега, иако позицијата на сопругот на Ристова отвори простор за контроверзии, партијата уверува дека нема да има влијание врз нејзината работа.