Skip to content
Најмалку 53 лица загинаа во рускиот воздушен напад врз центар за хуманитарна помош и подземно засолниште во Комишуваха, во украинската Запорошка област, на 2 ноември. Спасувачите на 6 ноември петти ден ги пребаруваат урнатините, додека десетици жители сѐ уште се водат како исчезнати.
Портпаролката на украинската служба за вонредни ситуации во регионот, Јулија Баришева, потврди дека се извлечени 53 тела. Според неа, околу 50 луѓе остануваат на списокот на исчезнати, а конечниот биланс допрва треба да се утврди.
Нападот погодил училиштен објект што се користел за делење хуманитарна помош. Според украинските власти, по првиот удар пристигнале полицајци и спасувачи, а потоа следувале нови бомбардирања. Претседателот Володимир Зеленски изјави дека дополнителните удари го погодиле засолништето во кое луѓето побарале заштита.
Потрагата продолжува под закана од нови напади. Екипите се превезуваат со оклопни возила, а на терен работат и службени кучиња. Густата прашина дополнително го отежнува пребарувањето, објаснија спасувачите на прес-конференција.
Портпаролот на регионалната воена администрација, Олександр Коваленко, изјави за „Киев индепендент“ дека спасувачите понекогаш можат да работат само 15 до 20 минути пред опасноста од дронови и воздушни удари да ги принуди да се повлечат.
Во неизвесноста има и случаи на пронајдени преживеани. Полицијата на 5 ноември пронашла жива и неповредена 56-годишна жена со која семејството изгубило контакт по нападот. Таа е седмото пронајдено лице од списокот на исчезнати, според извештајот.
Пред целосната руска инвазија, Комишуваха имала околу 5.000 жители. Сега останале приближно 500, претежно повозрасни луѓе. Уништеното засолниште им служело и како место за заштита и како пункт за добивање помош.
Руското Министерство за одбрана тврди дека нападот бил насочен кон украински воени единици. „Киев индепендент“ наведува дека Москва не приложила докази за тоа тврдење.
Последните деца биле евакуирани од населбата во јуни. Властите продолжуваат да ги повикуваат преостанатите жители да заминат во Запорожје, каде што се обезбедуваат привремено сместување и помош.
