Над 200 илјади домаќинства останаа без струја во БиХ

Повеќе од 200.000 домаќинства ширум Босна и Херцеговина во средата останаа без струја втор ден, соопштија властите, откако снежна бура предизвика големи нарушувања во неколку балкански земји.

Главно во северозападна и централна Босна, градовите и селата претрпеа постојани прекини на електричната енергија, соопштија двете електроенергетски претпријатија во земјата.

Снежните врнежи престанаа во средата, кога католичкото население го прославуваше Божиќ, но многу патишта останаа блокирани, отсекувајќи го пристапот до градовите и селата.

„Нашите тимови се на лице место цело време, прават се што е во нивна моќ“, рече Јелена Марковиќ, портпарол на дистрибутивната компанија Електропренос БиХ. Повеќето далноводи беа во недостапни области, рече таа.

Во соседна Хрватска, екипите за итни случаи соопштија дека спасиле 48 лица кои биле затрупани во снегот во централниот регион Лика.

Во Словенија, властите соопштија дека силниот ветер и снегот го оневозможиле спасувачкиот хеликоптер да стигне до унгарски планинар кој е блокиран на Алпите од неделата.

Околу 10.000 домови исто така беа без струја во поголемиот дел од средата во западна Србија, агенцијата Танјуг го цитираше Иван Спајиќ, шеф на одделот за вонредни ситуации во градот Шабац, иако проблемот главно бил среден до крајот на денот.