Уставниот суд одлучи да поведе постапка за уставноста на измените на Кривичниот законик

Уставниот суд со мнозинство од гласовите на деветте судии, одлучи да поведе постапка за уставноста на измените на Кривичниот законик, со кои во 2023 година се изврши упад во судството за да се ослободат од обвиненија за корупција поранешни функционери.

Според процедурата, Уставниот суд ќе изготви извештај кој ќе биде пратен до Собранието, со известување дека судот има сомнеж за уставноста на законот, по што Собранието ќе има рок да интервенира и да ги смени спорните одредби.
Во случај да не го стори тоа, судијата известител ќе направи реферат за укинување или поништување.

Ако се укинат измените, тогаш нема поента поведувањето на постапката од страна на Уставниот суд.

Ако се поништат измените на КЗ, тогаш сите обвиненија се враќаат во живот и судењата продолжуваат таму кај што застанале.

Ако Уставниот суд одлучи да се укинат измените, тогаш ќе има ,,дупка” во законот, односно нема во правна сила да се врати старото законско решение.

Ако пак одлучи да ги поништи измените, тогаш одлуката повлекува и последици, односно се што произлегло од измените нема да важи, со што би се обновиле сите предмети кои беа запрени против функционерите. Сепак оваа варијанта, според расположението во Уставниот суд, е оценета за речиси невозможна и тешко спроведлива.