Папата Франциск е во критична состојба, но се уште ги има сите овластувања

Според италијанските медиуми, папата Франциско е во критична состојба, со најновите информации што ги објави „Кориере дела сера“, во кои се наведува дека папата страда од сепса и му откажуваат бубрезите.

Од Ватикан потврдуваат дека папата ја прима терапијата, е расположен и се храни нормално, додека тврдат дека „Папата ништо не го боли“. Меѓу верниците, како во Ватикан, така и ширум светот, се одржуваат вечерни молитви за негово оздравување.

Папата Франциско, кој е хоспитализиран поради пневмонија на двете белодробни крила, продолжува да биде во критична состојба, што предизвикува висока готовност за можен вонреден медиумски настан – смрт на римокатоличкиот поглавар.

Иако постојат јасни прописи за пренос на должностите во случај на смрт или оставка на папата, Ватикан нема утврдени процедури за случај кога папата е болен или во кома. Нема конкретни норми кои се однесуваат на раководството на Римокатоличката црква кога поглаварот не е способен да ја извршува својата функција.

Според американската агенција АП, иако папата е болен и во критична состојба, тој и понатаму ги задржува сите овластувања. Хоспитализацијата го покренува прашањето што би се случило ако папата остане во кома или се повлече од функцијата, како што го направи папата Бенедикт Шеснаесетти.

Папата Франциско ја презеде функцијата на 13 март 2013 година и продолжува да раководи со Ватикан и неговите функционери, без оглед на своето здравје. Главен функционер меѓу нив е кардиналот Пјетро Паролин, државен секретар на Ватикан, кој се врати во Ватикан од Буркина Фасо по хоспитализацијата на папата.

Во случај кога папата не може да ги извршува своите должности, канонските адвокати предложија нови норми кои ќе ги регулираат ситуациите на привремена или трајна неспособност. Според нивните предлози, црквата би ја водела конклава или Колеџот на кардинали, а за привремена неспособност би била формирана специјална комисија.

Како што известува АП, во случај на смрт или оставка на папата, се активираат прописи за преодниот период – „меѓувластот“, во кој администрацијата и финансиите на црквата се управувани од кардиналот камерленго. Таа позиција моментално ја држи кардиналот Кевин Фарел.

Деканот на Колеџот на кардинали, кој би ја организирал конклавата за избор на нов папа, моментално е италијанскиот кардинал Џовани Батиста Ре. Папата Франциско, и покрај тоа што мандатот на Ре е завршен, одлучи да го задржи на оваа позиција.