Skip to content
Поранешниот американски претседател Доналд Трамп деновиве објави низа радикални мерки за кои вели дека имаат за цел да ѝ го вратат „редот, безбедноста и суверенитетот“ на Америка. Меѓу најгласните иницијативи е наредбата за повторно отворање на легендарниот затвор Алкатраз во заливот Сан Франциско, како и воведување 100% царина на сите странски филмови што се увезуваат во САД.
„Предолго Америка беше мачена од злобни и насилни криминалци, талогот на општеството. Кога бевме посериозна нација, знаевме како да ги изолираме таквите луѓе и да ги држиме далеку од граѓаните. Повторно ќе го сториме тоа,“ напиша Трамп на својата социјална мрежа Truth Social.
Тој порача дека нема повеќе толеранција за „сериски криминалци кои шират насилство и хаос по американските улици“ и побара од Федералниот затворски систем, Министерството за правда, ФБИ и Националната служба за безбедност веднаш да го обноват и прошират Алкатраз.
„Повторното отворање на Алкатраз ќе биде симбол на закон, ред и правда. Нема веќе да бидеме заложници на криминалци и судии кои се плашат да ја вршат својата работа,“ рече Трамп.
Неколку минути подоцна, Трамп најави уште една мерка: 100% царина на сите филмови произведени надвор од САД. Тој го овласти Министерството за трговија да започне постапка за спроведување на оваа политика.
„Американската филмска индустрија умира. Странските влади преку субвенции ги привлекуваат нашите уметници. Тоа е координиран напад и закана за националната безбедност,“ предупреди Трамп. „Холивуд умира, а со тоа и американското влијание. Време е филмовите повторно да се снимаат во Америка.“
