Skip to content
Вештачката интелигенција на „Мајкрософт“ поставила точна дијагноза во околу 83 проценти од сложените медицински случаи на тестирање, наспроти 36 проценти кај лекарите што користеле учебници и интернет. Резултатите се објавени во списанието „Сајенс“, но се однесуваат на симулирани случаи, а замената на лекарите со ваков систем засега останува недокажана можност.
Системот MAI-DxO бил проверуван со 304 сложени случаи објавени во „Њу Ингланд џурнал оф медисин“, како и со податоци од американска итна служба. Кај втората група, која опфаќа повообичаени здравствени проблеми, постигнал точност од околу 80 проценти, додека лекарите постигнале 47 проценти, соопшти компанијата.
Алатката работи како виртуелен тим од лекари. Почнува со ограничени информации, поставува дополнителни прашања, избира испитувања и ги преиспитува можните дијагнози со секој нов податок. Се оценува и колку би чинеле побараните испитувања, а не само дали конечниот одговор е точен.
Сепак, тестирањето се темели на пишани медицински податоци. Системот добива информации преку симулација, без непосреден преглед на пациентот. Затоа постигнатите проценти не покажуваат колкава би била неговата успешност во секојдневна ординација или болница.
„Мајкрософт“ најави испитување со медицинскиот центар „Бет Израел Диконес“ во Бостон, во кое пациенти директно ќе комуницираат со системот. Неговите проценки ќе се споредуваат со независни лекарски проценки. Тоа треба да покаже каде може да помогне во лекувањето и каде сè уште греши.
