Кузеска очекува по поразот на Вучиќ да се откријат врските со Мицкоски

Политичките промени во Србија ќе доведат до истраги што ќе ги откријат и, како што тврди СДСМ, криминалните врски со власта во Македонија, оцени Богданка Кузеска, членка на Извршниот одбор на партијата.

Кузеска го нарече Александар Вучиќ политички ментор на Христијан Мицкоски и ги поврза двете власти преку обвинувања за спорни тендери и бизниси со струја, енергетика и броила. Таа се осврна и на случајот со петте тони дрога и преписките на платформата „Скај“, тврдејќи дека идните истраги во Србија ќе откријат поврзаности со Македонија.

„Следат разврски, следат истраги, следи расчистување со криминалната организација, делче по делче“, изјави Кузеска, пренесе Макфакс.

Таа обвини и дека во Македонија се применува моделот на Вучиќ за создавање партии што го делат опозицискиот глас. Во тој контекст ги посочи ЗНАМ, Платформата и Левица, додека СДСМ ја претстави како единствена опозиција што власта не ја контролира.