Skip to content
По долги години во кои беше синоним за евтини летови низ Европа, Рајанер (Ryanair) повеќе не успева да ги задржи препознатливо ниските цени.
Ирската нискобуџетна авиокомпанија, која го изгради својот бизнис-модел врз основа на привлечни основни тарифи и дополнително наплатување за багаж, приоритетно качување и други услуги, најави поскапување на билетите во наредните месеци, објави порталот Simple Flying.
Финансиски резултати и најави за зголемување на цените
Компанијата неодамна ги објави финансиските резултати за фискалната 2024/25 година, која заврши на 31 март. Иако за првпат надмина 200 милиони превезени патници во една година – точно 200,2 милиони, што претставува раст од 9% – Рајанер забележа пад на нето-добивката за 16%.
Добивката по оданочување изнесувала 1,61 милијарда евра, наспроти 1,92 милијарди од претходната година.
Причини за падот и трендот на цените
Падот на профитот главно се должи на растот на трошоците за плати и други оперативни расходи, како и на доцнењето во испораката на авиони од страна на Боинг (Boeing).
Истовремено, просечните цени на билетите паднале за 7%, што дополнително вршело притисок врз заработката.
Цените веќе растат од првиот квартал
Извршниот директор на Рајанер, Мајкл О’Лири (Michael O’Leary), изјави дека билетите во првиот квартал од фискалната 2025/26 година се веќе поскапи за 10 до 20 проценти во споредба со истиот период од минатата година.
О’Лири очекува делумен опоравок и во вториот квартал, но напомена дека крајниот резултат за првата половина од годината ќе зависи главно од резервациите во последен момент и приходите за време на шпицот на летната сезона.
Како и обично во овој период од годината, вели О’Лири, компанијата сè уште нема јасна слика за втората половина, но се надева дека ќе успее да ја надомести поголем дел од ланскиот пад на цените.
