Skip to content
Кандидатот за градоначалник на општина Аеродром, д-р Александар Трајановски, по повод Светскиот ден на наставниците упати честитка и најави пакет мерки насочени кон подобрување на условите во основното и средното образование на локално ниво. „Наставничката професија е повеќе од работа — таа бара посветеност, креативност и инспирација. Нашите наставници го носат најголемиот товар на општествениот напредок и заслужуваат јасна, континуирана поддршка,“ изјави Трајановски.
Во фокусот на неговата образовна агенда се инфраструктурни и програмски интервенции во училиштата во Аеродром. Тој најави подобрување на наставните услови и опремување на училниците со современи наставни материјали и нагледни средства, за, како што рече, да се олесни работата на наставниците и да се зголеми интересот кај учениците. „Секој наставник заслужува современа и достоинствена работна средина, а секое дете — еднаква шанса за квалитетно образование,“ рече тој.
Паралелно, Трајановски најави континуирани обуки и професионално усовршување, прилагодени на актуелните предизвици во наставата, како и систем на повисоки награди и институционална поддршка за најдобрите наставници. „Целта е мотивација и повисоки резултати, но и јасна порака дека трудот ќе биде препознаен и вреднуван,“ додаде тој.
Како дел од планот, кандидатот најави и поттикнување на истражувања, училишни проекти и иновации што би ги позиционирале училиштата во Аеродром како современи центри на знаење. „Ќе бидам партнер и поддржувач на наставниците — вашиот труд ќе биде ценет и почитуван. Среќен Светски ден на наставникот,“ порача Трајановски.