Грипот зема замав: 188 случаи и две жртви

Грипот веќе е тука. Според најновите податоци на Институтот за јавно здравје, од почетокот на сезоната 2025/2026 се регистрирани 188 случаи на грип во земјата, што претставува зголемување од 77 проценти во споредба со истиот период минатата година и 36 проценти повеќе од просекот на последните 14 сезони. Најмногу заболени има во Гостивар, каде што досега се пријавени 79 случаи, а највисока инциденца е забележана во Македонски Брод. Институтот потврдува и дека досега се евидентирани две починати лица поврзани со грип.

Паралелно со зголемувањето на вкупната бројка од почетокот на сезоната, веќе се гледа забрзано ширење и на неделно ниво. Во периодот од 13 до 19 октомври се пријавени 83 случаи на заболувања слични на грип, што претставува раст од 66 проценти во однос на истиот период лани и уште пет проценти повеќе од претходната недела. Најзасегнати сега се Гостивар и Тетово, со 30, односно 12 нови случаи во таа недела, а следуваат Куманово, Прилеп, Македонски Брод, Струмица, Неготино и Радовиш. Поголемиот дел од пријавените се лица на возраст од 15 до 64 години, што, според епидемиолозите, е очекувано затоа што оваа група е најподвижна и најмногу во контакт со други луѓе. И покрај ова, инциденцата сè уште е на меѓусезонско ниво: 4,5 заболени на 100.000 жители, што значи дека формално сезоната на грип не е прогласена, но растот е јасен сигнал дека вирусот почнува активно да циркулира.

Здравствените власти ја засилуваат пораката дека превенцијата почнува со вакцина. Министерството за здравство за сезоната 2025/2026 набави околу 80.000 дози бесплатна четиривалентна вакцина за ризичните групи – лица постари од 65 години, хронично болни, бремени жени, деца од шест месеци до пет години и здравствени работници – и овие вакцини се даваат преку центрите за јавно здравје и преку електронското пријавување на vakcinacija.mk. До средината на октомври веќе се вакцинирани 13.273 лица од приоритетните категории, а за граѓаните кои не спаѓаат во ризична група обезбедени се и дополнителни 2.400 комерцијални дози. Само во првите денови од кампањата за имунизација закажале десетици илјади граѓани, што здравствените власти го толкуваат како пораст на свеста по искуството со пандемијата.