Skip to content
Велика Британија соопшти дека на три месеци ја одложува примената на санкциите кон бугарските подружници на рускиот нафтен гигант Лукоил, пренесе бугарската новинска агенција БТА.
Повикувајќи се на соопштение од Канцеларијата за имплементација на финансиски санкции во Лондон, БТА јавува дека Лукоил Бугарија добива продолжување на дозволата за работење со британски компании и банки.
Властите во Софија истакнуваат дека се очекува слична одлука да донесе и Канцеларијата за контрола на странски средства при американското Министерство за финансии. Оваа канцеларија треба да ја забрани соработката со рускиот конгломерат почнувајќи од 21 ноември.
На прашањето дали и кога ќе стапи на сила одложувањето од страна на САД, бугарскиот министер за правда Георги Георгиев рече дека не може да прецизира точна временска рамка, но очекува тоа да се случи наскоро.
„Имаме уверувања дека мерките што ги спроведовме и официјално ги соопштивме се соодветни и целосно усогласени со целите на санкциите и интересите на бугарското општество“, изјави тој пред новинарите.
Најголемата рафинерија на Балканот
Подружницата на Лукоил во близина на црноморскиот град Бургас е најголемата нафтена рафинерија на Балканот. Со национална мрежа на магацини и бензински пумпи, компанијата е најголемиот економски субјект во Бугарија.
Софија денес го назначи Румен Спецов, актуелен директор на Националната агенција за приходи, за комерцијален директор на рафинеријата, задолжувајќи го да обезбеди нејзино непречено функционирање.
Пратениците во бугарскиот парламент денес го поништија претседателското вето на законот кој и овозможува на владата да ја преземе контролата врз рафинеријата и да ја заштити преку можноста за продажба, на тој начин штитејќи ја од санкции.
Бугарскиот претседател Румен Радев, кој претходно стави вето, предупреди дека законот може да ја изложи земјата на идни финансиски ризици.
Извор: N1info.rs
