Ова е сега планот на Трамп за завршување на војната во Украина: Дали договорот е блиску?

Соединетите Американски Држави му сигнализираа на украинскиот претседател Володимир Зеленски дека Киев мора да ја прифати рамката што ја составија САД за завршување на војната со Русија, во која се предлага Украина да се откаже од дел од својата територија и одредено оружје, изјавија за Ројтерс двајца соговорници запознаени со ситуацијата.

Изворите, кои побараа анонимност поради чувствителноста на прашањето, рекоа дека меѓу другото, предлозите вклучуваат намалување на големината на вооружените сили на Украина. Вашингтон сака Киев да ги прифати главните точки од оваа рамка, рекоа изворите.

Претседателот на Украина, Володимир Зеленски, денес се сретна со претседателот на Турција, Реџеп Таип Ердоган, во обид да ги „оживее преговорите со Русија“. Утре, очигледно, Зеленски има важен состанок со „тимот“ на Трамп од Пентагон, и сето тоа во моментот кога се појавија информации дека Вашингтон разговара со Русија за можни услови за мир.

Висок украински функционер за Ројтерс изјави дека Киев „примил сигнали“ за низа американски предлози за завршување на војната, кои Вашингтон ги разгледува со Русија и дека Украина немала никаква улога во подготовката на тие предлози.

Нема разговори меѓу Киев и Москва од состанокот во Истанбул во јули, а во меѓувреме руските сили продолжуваат со жестоки напади врз Украина. Само во синоќешниот напад беа убиени 25 лица.

Напорите за оживување на мировните преговори сега се чини дека добиваат на интензитет, иако Москва сè уште не покажува знаци дека ќе ги промени своите услови за завршување на војната.

Зеленски се сретна со Ердоган по посетите на Грција, Франција и Шпанија, кои се одржаа и покрај политичката криза во Украина поради скандалот со корупција во кој парламентот ги разреши министрите за енергетика и правда во среда. Зеленски остана фокусиран на воените напори и во вторникот рече дека се подготвува за „оживување на преговорите“ и на тоа како да се постигне „праведен мир за Украина“.

Турција, членка на НАТО која одржува блиски односи со двете страни, беше домаќин на првата рунда мировни преговори во првите недели од војната во 2022 година – единствените такви разговори до оваа година, кога американскиот претседател Доналд Трамп започна нова иницијатива за прекин на конфликтот.

Кремљ објави дека руските претставници нема да учествуваат во разговорите, но дека претседателот Владимир Путин е отворен за разговори со САД и Турција за резултатите од тие дискусии. „Аксиос“ објави во вторник дека Вашингтон тајно работи на план за прекин на војната во консултација со Русија.

Кога беше прашан за планот, портпаролот на Кремљ, Дмитриј Песков, рече дека засега „нема вести во врска со тоа“.

Кои се условите на Путин?

Путин долго време бараше Киев да се откаже од плановите за приклучување кон воениот сојуз на НАТО предводен од САД и да ги повлече своите трупи од четири области што Москва ги смета за дел од Русија. Москва не даде никакви индикации дека се откажала од кое било од тие барања, а Украина вели дека нема да ги прифати.

Американската делегација, предводена од секретарот на армијата Ден Дрискол, е во Киев на „мисија за утврдување факти“, објави амбасадата на САД во Киев. Делегацијата ја предводи началникот на Генералштабот на армијата, генерал Ренди Џорџ, а тој и Дрискол, со Зеленски ќе се сретнат во четврток.

Турски извор изјави дека специјалниот претставник на САД, Стив Виткоф, може да ја посети и Турција, но американските претставници не најавиле таква посета. Друг извор од турското Министерство за надворешни работи изјави дека турските претставници ќе одржат средби само со Зеленски и дека не се очекува Виткоф да биде дел од разговорите во Анкара.