По паузата, процесот за ПУЛС продолжува со побарувања за штета

Судењето за трагичниот пожар во дискотеката „Пулс“ во Кочани денеска накратко беше прекинато, откако одбраната на дел од обвинетите реагираше дека сè уште не им е доставен интегрираниот текст на обвинението. По забелешките на адвокатите, рочиштето беше прекинато со пауза од околу половина час.

Адвокатите истакнаа дека не е можно обвинетите да се изјаснат за вина и да дадат воведни зборови за текст што воопшто не им е доставен, ниту во хартиена ниту во електронска форма. Според нив, без интегрирано и прецизно формулирано обвинение, се доведува во прашање и правото на одбрана.

По паузата, судот се согласи да не се продолжи со изјаснување за вина на обвинетите на денешното рочиште. Наместо тоа, процесот ќе продолжи процедурално, со изјаснување и разгледување на побарувањата за надомест на штета од страна на оштетените и нивните застапници, а изјаснувањето за вина ќе се одложи за нареден термин.