Советот: интегрираното обвинение за „Пулс“ не е ново, рочиштето продолжува на 2 декември

Советот што одлучува по приговорите на одбраната денеска утврди дека интегрираното обвинение за трагедијата во кочанската дискотека „Пулс“ не претставува нов обвинителен акт. Според образложението, во текстот не се воведени нови обвинети, нема нови оштетени лица и не е променета правната квалификација на кривичните дела, туку само е прецизирана временската рамка за секој обвинет поединечно.

Истовремено, судот ги прифати приговорите на дел од бранителите дека обвинението со листа на докази не им е доставено непосредно на обвинетите. Бидејќи адвокатите не прифатиле да бидат единствен канал за достава, судот најави дека утре и задутре обвинението ќе биде доставено електронски на мејл-адресите, а за обвинетите што се во притвор – во писмена форма во затворот.

Со тоа, денешното рочиште е завршено без изјаснување за вина. Следното продолжение на процесот за „Пулс“ е закажано за 2 декември, кога се очекува обвинетите веќе да го имаат интегрираниот текст на обвинението и прилог-листата на докази.