Skip to content
Во голема меѓународна полициска операција насочена кон сузбивање на криминал поврзан со моторни возила, спроведена под водство на Фронтекс од 20 до 31 октомври, запленети се 694 возила, значителни количини дрога, оружје и стотици фалсификувани документи. Акцијата со кодно име „JAD Mobile 8“ се одвиваше на територијата на 26 држави, меѓу кои членки на Европската унија, како и земји од Западен Балкан и Југоисточна Европа.
Операцијата беше координирана од Фронтекс заедно со Германија, Грција, Полска и Шпанија, а во неа учествуваа националните полициски и гранични служби на сите вклучени земји. Поддршка обезбедија и Интерпол и Европол, кои понудија достапност до специјализирани бази на податоци и оперативна експертиза.
Најголем дел од запленетите возила биле патнички автомобили, но откриени се и украдени мотори, кампери, камиони, полуприколки, како и градежни и земјоделски машини. Експертите предупредуваат дека расте проблемот со кражбите на електрични велосипеди и тротинети, чие следење е отежнато поради недостиг од меѓународно поврзани бази на податоци. Утврдено е дека најголем број од возилата биле украдени, додека дел биле користени за други криминални активности како трговија со дрога и криумчарење мигранти. Крадците во најголем број случаи ги префрлале возилата во други земји од ЕУ или ги извезувале на пазарите во Западен Балкан, Источна Европа, Блискиот Исток, па дури и Северна и Западна Африка.
Акцијата открила и сериозни злоупотреби со фалсификувани документи, измами во осигурувањето, кршење договори за лизинг и злоупотреби во рент-а-кар компании. Забележани се и случаи на транспорт на украдени луксузни возила со авион, користејќи фалсификати со исклучително висок квалитет. Дел од автомобилите биле крадени исклучиво за продажба на делови, а нелегалната онлајн трговија со автоделови продолжува да расте.
Операцијата ги опфатила и кражбите на пловни објекти. Во Португалија, меѓународни експерти помогнаа во заплената на 32 брода и 87 мотори. Во една од поврзаните акции е запленета околу 6 тони смола од канабис, 11 парчиња огнено оружје и имот што вклучува јахта, шест брода и 28 возила. Вкупниот резултат од двонеделната операција вклучува и пронајдени 2.851 нелегален мигрант, 61 криумчар на луѓе, повеќе од 12 тони различни дроги, 14,6 милиони цигари, 9,8 тони суров тутун и 24 парчиња огнено оружје.
Хрватската полиција делуваше на подрачјето на Вуковарско-сремска Полициската управа, на границата со Србија и Босна и Херцеговина. Во координација со Фронтекс и царинските служби, одземени се 16 возила, спроведени се повеќе од 2.500 детални проверки и реализирани 12 меѓународни разменувања на податоци. Притоа биле откриени 19 фалсификувани или потражувани документи, а идентификувани се 40 сторители на прекршочни и кривични дела поврзани со прекуграничен криминал.
Оваа акција, една од најголемите досега во овој сектор, уште еднаш го потврдува растечкиот обем и сложеност на меѓународните криминални мрежи и важноста на координираната полициска соработка во Европа.
