Поранешната портпаролка на Зеленски: „Губиме. Секој следен договор ќе биде уште полош“

Поранешната портпаролка на украинскиот претседател Володимир Зеленски, Јулија Мендел (2019–2021), остро го коментираше актуелниот тек на војната и напорите за постигнување мировен договор, во момент кога се водат паралелни преговори за повеќе предлози – американскиот план од 28 точки, неговата ревидирана верзија од 19 точки, како и руски предлози кои, според Reuters и Bloomberg, делумно се вградени во документите за кои преговараат Вашингтон, Москва и Киев.

Мендел јавно предупреди дека Украина влегува во опасна фаза. „Секој следен договор за Украина ќе биде само полош, затоа што губиме. Губиме луѓе, губиме територија, губиме економија,“ напиша таа на платформата Х. Според неа, Европската унија – која од февруари 2022 година ѝ платила на Русија повеќе од 311 милијарди евра за енергенси и стоки – нема вистинска стратегија, ниту пак механизам да го прекине полнењето на рускиот буџет, ниту доволно силна поддршка за Украина да победи. „ЕУ нема директен дијалог со Москва и нема реално влијание ни врз Кремљ ни врз Вашингтон,“ додаде таа.

Таа предупреди и на наивноста во дел од аргументите што се слушаат во Европа: „Кога луѓе велат дека „Русија освоила многу малку територија“, тоа звучи детинесто ако се земе предвид човечката цена. Изгубивме повеќе луѓе за три години отколку што некои европски земји имаат население.“

Мендел ја опиша состојбата во земјата со силни зборови: „Мојата земја крвари.“ Според неа, многумина што рефлексно ги одбиваат сите мировни предлози мислат дека ја бранат Украина, но тоа е „најјасен доказ дека немаат поим што навистина се случува на фронтот и внатре во државата.“

„Ова не е холивудски филм,“ напиша таа, нагласувајќи дека останува верна на вредностите на демократијата и човечкиот живот. „Човечкиот живот е највисокото добро. Луѓето – живи, вистински, дишечки луѓе – се тие што треба да се спасат.“