Skip to content
Пожарникарските служби во Хонгконг утрово успеале да спасат постар маж од една од повеќекатниците зафатени од големиот пожар што го зафати станбениот комплекс во округот Тај По, пренесува CNN.
„Се трудиме најдобро што можеме и нема да пропуштиме ниту една шанса да спасиме живот“, изјави Вонг Ка Винг, заменик-директор на Пожарникарската служба, на прес-конференција во Хонгконг.
Тој потврди дека пожарникарите успеале да го лоцираат и извлечат мажот од ходникот на 31. кат од погодената зграда, по што тој бил пренесен во болница.
Вонг истакна дека екипите и понатаму се соочуваат со исклучително тешки услови во внатрешноста на зградите, поради постојано високите температури, паднатите скелиња и оштетените конструкции, додавајќи дека работат кат по кат. „Многу ни е тешко“, рече тој.
Бројот на загинати од пожарот, кој избувна во средата во станбен комплекс составен од осум згради, се искачи на 55. Според најновите податоци, 279 лица сè уште се водат како исчезнати.
