Skip to content
Крах на работните места за дата аналитичари – така би можеле да се опишат најновите бројки од најголемиот сајт за вработување во светот, Indeed. Според нивниот годишен извештај, токму овој сегмент на тех индустријата денес изгледа најлошо од сите: има 40 проценти помалку огласи за работа во дата и аналитика отколку пред пандемијата, а конкуренцијата за секое слободно место никогаш не била поголема.
Големата слика за тех-работните места е веќе загрижувачка. Индексот на огласи за тех позиции на Indeed, кој во 2022 година беше над 200 поенa во услови на постпандемиски бум, денес е паднат на 67 – драматичен пресврт по само две години.
Кога ќе се „зумира“ само во дата и аналитика, ситуацијата изгледа уште потешко. Овој сегмент има индекс од 60, најниско ниво меѓу сите следени категории, што значи дека отворањата за бизнис-аналитичари, дата аналитичари, дата сајентисти и BI-развивачи се поретки дури и од општите тех позиции. Истовремено, бројот на пријави по оглас постојано расте – класичен рецепт за пазар во кој има многу повеќе кандидати отколку места.
Економистите на Indeed предупредуваат дека овде се судираат две тенденции. Од една страна, компаниите во годините на бум агресивно вработуваа профили поврзани со податоци, па денес едноставно немаат потреба да ги заменуваат во истото темпо. Од друга, илјадници луѓе кои вложиле време и пари во обуки за дата сајенс не сакаат лесно да го сменат правецот на кариерата, па упорно конкурираат за сè помал број огласи во својата тесна професија.
На ова се надоврзува и генеративната вештачка интелигенција. Новите алатки им овозможуваат на компаниите и на „обичните“ вработени многу полесно да анализираат податоци, без длабока формална подготовка. Indeed забележува дека АИ сè уште не ги заменува целосно овие профили, но им помага на фирмите „да прават повеќе со помалку“, што дополнително го лади апетитот за нови вработувања во аналитичките тимови.
За кандидатите, преводот на овие бројки е брутален: помалку огласи, повеќе пријави и послаб раст на платите отколку пред неколку години. Економистите советуваат дека потрагата по „соврешена“ работа во дата и аналитика може да трае подолго, а дел од професионалците ќе мора да размислат и за пренасочување – кон роли каде аналитиката е само дел од описот, а не целата професија.
