ИЈЗ уверува: водата во „Димо Хаџи Димов“ е безбедна, проблемот е во кујната

Институтот за јавно здравје ја смирува паниката меѓу родителите на учениците од училиштето „Димо Хаџи Димов“ во скопската населба Влае. По серијата труења и стомачни тегоби кај десетици деца, целосно се завршени анализите на мострите вода земени од училишните чешми. Резултатот е јасен: водата е во рамките на сите референтни вредности и не содржи тешки метали, па не се смета за извор на заразата.

Од ИЈЗ потврдуваат дека физичко-хемиската и микробиолошката анализа на водата не покажала никакви отстапувања. Параметрите за квалитет на водата за пиење се во дозволените граници, а во ниту една од земените мостри не се пронајдени тешки метали или други супстанци што би можеле да предизвикаат акутно труење кај учениците.

Но истата лабораториска слика не важи за храната и кујната во училиштето. Претходните денови ИЈЗ соопшти дека во примерок од мусака која им била сервирана на децата во првата смена се пронајдени грам-негативни фекални бактерии од групата Enterobacteriaceae. Истиот тип бактерии е откриен и на дел од училишните чешми – две во училници и една во кујната – како и на работни површини, што, според стручните служби, директно укажува на недоволна хигиена во кујната и училиштето.

Институтот веќе објави дека од земените примероци биолошки материјал од деца со симптоми, шест од седум се позитивни на норовирус – силно заразен вирус што лесно се пренесува преку контаминирана храна, нечисти раце и површини и дава токму таква клиничка слика каква што пријавиле учениците: повраќање, дијареја и стомачни грчеви. Кај една вработена во кујната е откриена стафилокока, што дополнително ја потврдува сликата за нарушена хигиена во просториите каде се подготвува и служи храната.

Според досегашните информации, на 26 ноември голем број ученици од „Димо Хаџи Димов“ се пожалиле на нагли стомачни тегоби, а дел од нив биле примени и на Детската клиника во Скопје. Дел од децата веќе се пуштени на домашно лекување, додека други остануваат под лекарски надзор, но надлежните уверуваат дека состојбата е под контрола. Паралелно со анализите на ИЈЗ, Агенцијата за храна и ветеринарство спроведува вонредни контроли во кујните на уште девет основни училишта во Карпош, затоа што со сите нив стопанисува истиот оператор со храна.

Иако информацијата дека водата е безбедна донекаде ја разоружува првичната паника кај родителите, случајот го отвора прашањето за надзорот врз училишните кујни и условите во кои се подготвува храната за учениците. ИЈЗ најавува дека и за дополнителните мостри од други училишта ќе се известува во наредните денови, а приправните и дежурни тимови продолжуваат да работат за побрзо и поточно расчистување на сите аспекти од ова труење.