Skip to content
Во Општина Центар повторно се затегнува обрачот околу инвеститорите кои го узурпираат јавниот простор. Инспекциските служби во изминатиот период извршиле контроли на 30 активни градилишта, а дури во 24 случаи се изречени казни за непочитување на прописите – од незаконско зафаќање јавни површини до валкање на улиците и тротоарите со градежен шут и кал од камионите. Паричните санкции се движат од 1.300 до 1.800 евра, зависно од тежината на прекршокот.
Центар, како најурбанизирана општина во Скопје, со години се соочува со градежен притисок: тесни улици, затворени тротоари, поставени огради на јавни површини и камиони што без миење на гумите се вклучуваат во сообраќајот. Токму овие слики, кои граѓаните секојдневно ги гледаат пред своите згради, биле фокус на инспекциските надзори – дали градилиштата имаат уреден пристап, дали ја почитуваат границата на парцелата и дали се грижат да не ја затрупаат околината со прашина и кал.
Градоначалникот Горан Герасимовски појасни дека контролите се редовни и дека општината нема да толерира узурпација на јавниот простор. „Континуирано спроведуваме надзор на активните градилишта во општината. Сите што ги прекршуваат прописите и го узурпираат јавниот простор ќе се соочат со соодветни мерки. Наша цел е да обезбедиме уредена средина за граѓани“, изјави тој, најавувајќи дека инспекциските екипи ќе продолжат да излегуваат на терен и по пријава од жители.
Од Општина Центар дополнително посочуваат дека овие акции се дел од поширока стратегија за спречување на бесправна градба и заштита на заедничкиот простор. Намерата е инвеститорите да знаат дека дозволата за градба не значи неограничено право да ги затвораат улиците и тротоарите, туку обврска да ги почитуваат правилата, да постават соодветна заштитна ограда, да го чистат теренот и да ја организираат логистиката така што граѓаните ќе можат безбедно да се движат покрај градилиштето.
