Skip to content
Новиот претседател на Државната комисија за спречување на корупцијата, Адем Чучуљ, денеска даде свечена заклетва пред претседателот на Собранието Африм Гаши и официјално го презеде кормилото на Антикорупциска. Човекот кој речиси две децении работи во истата институција, сега вели дека истата таа институција мора да стане поотворена, поостра и поефикасна – и дома, и во очите на Брисел.
Чучуљ пред пратениците нагласи дека за него е чест, но и голема одговорност да застане на чело на орган во кој професионално пораснал. Најави дека ќе инсистира Антикорупциска да работи транспарентно, а истото ќе го бара и од сите други органи на власта. Комисијата, како што рече, мора да стане институција што не само што проверува, туку и промовира интегритет – и кај носителите на јавни функции, и во системот во целина. Само така, според него, може да се намали корупцијата и да се врати довербата на граѓаните во институциите.
Одговарајќи на новинарско прашање што ќе му биде приоритет, Чучуљ директно се повика на извештаите од Брисел. Оценките на Европската комисија за борбата против корупцијата, како што призна, не се добри – и токму таму сака да направи пресврт. „Ќе треба напор и многу работа“, порача, најавувајќи дигитализација на процесите, зајакнување на превентивните алатки и нова Национална стратегија за спречување на корупцијата, која се подготвува во инклузивен процес со сите релевантни чинители.
Новата стратегија, според Чучуљ, треба да биде поконцизна и поизведлива од претходната – документ што не останува само на хартија, туку реално ги затвора системските дупки од кои никнува корупцијата. Во таа насока, тој најави и дека ДКСК ќе стане многу поактивна во проверка на имотната состојба на избраните и именуваните функционери – област која е забелешка во Извештајот на Европската комисија и воедно шеста препорака на ГРЕКО, телото на Советот на Европа за борба против корупцијата.
Чучуљ потсети дека Комисијата веќе е во фаза на изработка на новата стратегија и дека ќе инсистира таа да ги адресира токму слабостите кои досега ја држеа Македонија во долниот дел на европските скалила за владеење на правото. За тоа, како што рече, ќе му треба поддршка од целиот состав на Антикорупциска, но и јасна политичка волја да се прифатат препораките и да се спроведат.
Адем Чучуљ вчера беше едногласно избран за претседател на ДКСК со 82 гласа „за“ во Собранието, по што денешната заклетва беше последниот формален чекор. Сега пред него стои многу потешката задача: да ја претвори институцијата во вистински коректив на власта, да ги поправи оценките во Брисел и, уште поважно, да ја поправи оценката на граѓаните за тоа дали државата навистина сака да се справи со корупцијата, а не само да ја глуми борбата.
