Трамп отповикува повеќе амбасадори назначени во времето на Бајден

Администрацијата на Доналд Трамп започна со отповикување на поголем број кариерни амбасадори назначени за време на поранешниот американски претседател Џо Бајден, потврдија официјален претставник на Стејт департмент и претседателот на синдикатот на дипломатите.

Џон Динкелман, претседател на Американска асоцијација на странска служба (AFSA), изјави дека амбасадори од региони како Источна Азија и Пацификот добиле телефонски повици со кои им било соопштено дека мора да ги напуштат своите функции најдоцна до 15 или 16 јануари. Како што вели, не им било дадено официјално образложение за одлуката.

Според неименуван извор од Стејт департментот, станува збор за околу дваесетина амбасадори, но точниот број сè уште не е целосно познат. Одлуката се смета за невообичаена бидејќи се однесува на дипломати од кариерната странска служба, а не на политички назначени амбасадори.

Вообичаено, новите претседатели ги заменуваат политичките именувања, додека кариерните дипломати продолжуваат да служат, со оглед на тоа што нивната улога е да ја спроведуваат политиката на секоја избрана администрација, без разлика на партиската припадност. Сепак, администрацијата на Трамп со години изразува недоверба кон кариерниот кадар во Стејт департментот, кој често го опишува како „упориште на либерализмот“. Во тој контекст, илјадници вработени веќе биле принудени да ги напуштат своите позиции.

Динкелман предупреди дека ваквите потези можат сериозно да ја нарушат американската дипломатија. „Ова продолжува да ја поткопува довербата во професионалната странска служба и нејзината способност ефикасно да ги спроведува политиките на избраното раководство“, изјави тој.

Од Стејт департментот, пак, во писмена изјава нагласија дека отповикувањата се „стандардна практика во секоја администрација“. „Амбасадорот е личен претставник на претседателот и тој има право да обезбеди луѓе кои ќе ја унапредуваат агендата ‘Америка на прво место’“, се наведува во соопштението.

Иако амбасадорите формално служат по волја на претседателот, критиките од Конгресот не изостанаа. Сенаторката Џин Шахин, водечки демократ во Комитетот за надворешни односи на Сенатот, истакна дека во моментов има околу 80 испразнети амбасадорски позиции. „Со отстранување на искусни кариерни амбасадори, претседателот Трамп ѝ отстапува лидерска улога на САД на Кина и Русија“, предупреди таа.

Истовремено, администрацијата на Трамп сè уште бавно ги пополнува испразнетите амбасадорски места, а дел од номинациите се заглавени во Сенатот, што дополнително ја отвора дебатата за иднината и капацитетот на американската дипломатска мрежа.